નમસ્કાર મિત્રો, અને સૌને ૨૦૧૨ના નવવર્ષની હાર્દિક શુભકામનાઓ.
2012 (MMXII), જ્યોર્જીયન પંચાંગ પ્રમાણેનું રવિવારથી શરૂ થતું આ લિપવર્ષ છે. અર્થાત ફેબ્રુઆરીમાં ૨૯ દિવસો આવશે. રવિવારથી શરૂ થતું લિપવર્ષ હવે પછી ૨૦૪૦નું વર્ષ થશે. દર ૨૮ વર્ષે આ યોગ થાય છે ! આ વર્ષે ત્રણ વખત શુક્રવાર અને ૧૩ તારીખ આવશે. જાન્યુઆરી, એપ્રિલ અને જુલાઈમાં. (અને એ ત્રણે દિવસોમાં કોઈ જાહેર રજા ન હોય નોકરીયાતોએ હક્ક રજા મેલીને પણ ઓફિસથી દૂર રહેવું ! વેપારીઓએ પછીના રવિવારે કમાઈ લેવું પણ આ ત્રણે દિવસ સૌરાષ્ટ્રમાં હોય તો દિવ અન્યથા દમણ ચાલ્યું જવું !! આ તો પછી અમારો દોષ ના કાઢવો 🙂 )
સંયુક્ત રાષ્ટ્રસંઘ દ્વારા આ વર્ષને ’આંતરરાષ્ટ્રીય સહકારી વર્ષ’ જાહેર કરાયું છે. આ વર્ષને ’આંતરરાષ્ટ્રીય સાતત્યપૂર્ણ ઊર્જા વર્ષ’ પણ જાહેર કરાયું છે. (આનંદો ! આશા રાખીએ આ વર્ષે પાવરકાપનો ઓછામાં ઓછો ત્રાસ સહન કરવો પડે !) તદ્ઉપરાંત વર્ષ ૨૦૧૨ એ ગણિતજ્ઞ, તર્કશાસ્ત્રી, કોમ્પ્યુટર વિજ્ઞાની અને સંકેતલિપિશાસ્ત્રી ’એલન ટ્યૂરીંગ’નું જન્મ શતાબ્દી વર્ષ હોવાને નાતે ’એલન ટ્યૂરીંગ વર્ષ’ પણ જાહેર કરાયું છે.
૨૦૧૨ના જાન્યુઆરીના અંત કે ફેબ્રુઆરીની શરૂઆતથી શરૂ થતું ચાઈનિઝ નવવર્ષનું પ્રાણી છે ’ડ્રેગન’ (dragon). અર્થાત આ ડ્રેગનવર્ષ છે. ચાઈનિઝ માન્યતા અનુસાર ડ્રેગનવર્ષ સુઃખ, સમૃદ્ધિ અને દીર્ઘાયુષ્ય લાવે છે. (અર્થાત, Don‘t Worry Be Happy ! 🙂 )
અને હવે બહુ ચર્ચિત (અને આપણે બહુ નથી ચર્ચવી તેવી !) વાત, માયા પંચાંગ પ્રમાણે આ વર્ષની ડિસેમ્બર ૨૧ એ ૫૧૨૫ વર્ષના ચક્રનો અંત છે, (જેને કેટલાક વિદ્વાનોએ ખરે જ ’અંત’ તરીકે ચગાવ્યું છે !!) જે હોય તે, આ વર્ષની ૨૨ ડિસેમ્બરના મુકવા માટેનો લેખ સૌ મિત્રો તૈયાર રાખશો ! (કે વાંચવા તૈયાર રહેશો !!) ૨૧ ડિસેમ્બરનું તો ૨૧ ડિસેમ્બર જાણે, પરંતુ આ વર્ષની માન્યતાઓને લગતા સેંકડો લેખ આપણને આ વર્ષે વાંચવા, ચર્ચવા મળશે જ તેવી નક્કર ભવિષ્યવાણી હું કરૂં છું 🙂
આગળ થોડું આ ૨૦૧૨ની શક્યતઃ ઘટનાઓ વિશે:
* ભારતીય પ્રજાને ધ્યાને રાખીને આશા રાખીએ કે આ વર્ષે તેમને વધુ કારગર અને સ્વયં ઓછું ભ્રષ્ટ એવું લોકપાલ-લોકાયુક્ત માળખું મળે. (અને આને જ મારા તરફથી વર્ષ ૨૦૧૨ની શુભકામના પણ ગણવી)
* જાન્યુ. ૧૩-જાન્યુ. ૨૨, પ્રથમ શિયાળુ યુવા ઑલિમ્પિક્સ, ઈન્ન્સબ્રુક, ઑસ્ટ્રિયા ખાતે.
* જાન્યુ. ૩૧, ૪૩૩ ઈરોસ નામક પૃથ્વી નજીકનો દ્વિતિય સૌથી મોટો ખગોળીય પિંડ, પૃથ્વીથી ૨,૬૭,૮૦,૦૦૦ કિ.મી. નજીક ! થી પસાર થશે. (આશા રાખીએ તે પથચ્યુત્ત ન થાય 🙂 )
* મે ૧૨ – ઓગસ્ટ ૧૨, વિશ્વ મેળો ૨૦૧૨, યોશુ, દ.કોરિયા ખાતે.
* જૂન ૬, આ સદીનું બીજું અને છેલ્લું શુક્રનું સૂર્ય સંક્રમણ (solar transit of Venus). હવે પછીનું સંક્રમણ ૨૨મી સદીના ૨૧૧૭, ૨૧૨૫ના વર્ષમાં જોવા મળશે. (આપણા સૌ માટે આ છેલ્લી તક !)
* જુલાઈ ૨૭ – ઑગસ્ટ ૧૨, લંડન ઑલિમ્પિક્સ. આ સાથે લંડન પ્રથમ એવું શહેર બનશે જેણે ત્રણ ત્રણ વખત ઑલિમ્પિક રમતોત્સવની યજમાનગીરી કરી હોય.
* ૨૦૧૧નાં અંત સમયમાં પહેલી એપ્રિલ ન હોવા છતાં ભારતના નેતાઓએ ભારતની જનતાને એપ્રિલફૂલ બનાવી ! પરંતુ આ વર્ષે તો ’સંભવામિ યુગે યુગે’ નું વચન આપનારો પણ ખરેખર પહેલી એપ્રિલે સૌને એપ્રિલફૂલ ન બનાવી જાય અને સૌના હૃદયમાં પ્રગટે તેવી પ્રાર્થના ! (ન સમજાયું હોય તો કેલેન્ડર જોવા કૃપા કરશો !)
સને: ૨૦૦૯માં એક ચલચિત્ર આવેલું જેનું નામ હતું “૨૦૧૨” કદાચને ન જોયું હોય તો જોઈ લેવું ! ચિંતા ન કરવી પણ સાથે સાથે ’ઈન્ડીપેન્ડન્સ ડે’, ધ ડે આફ્ટર ટુમોરો’, ’૨૦૧૨ ડૂમ્સ ડે’ વગેરે વગેરે ચલચિત્રો પણ જોઈ કાઢવા અને પછી ૨૦૧૩માં જોવા લાયક ચલચિત્રોની યાદી બનાવવા બેસી પડવું !! અને હા, અહીં ’૨૦૧૨’ સંલગ્ન અ..ધ..ધ..ધ ચોપડીઓ પણ છે.
અહીં આપણે આ વર્ષ ૨૧મી સદીનું અને ત્રીજી સહસ્ત્રાબ્દીનું બારમું વર્ષ હોવાને નાતે “૧૨” પર પણ થોડું ડખોળકાર્ય કરીશું. બારનો અંક સૌ પ્રથમ તો વર્ષના બાર મહિના દર્શાવે છે. માપન પદ્ધત્તિમાં ૧૨ = ૧ ડઝન એવું માપ પણ બેસે છે. ૧૨ ઈંચ = ૧ ફીટ તથા ઘડીયાળ સામે જોશો તો દિવસ અને રાતની બાર-બાર કલાક પણ ધ્યાને આવશે. ઈશુના બાર શિષ્યો હતા. નાતાલનાં બાર દિવસો ગણાય છે. ઈઝરાયેલના બાર કબિલાઓ જેકબના બાર પુત્રોનો વંશ હોવાનું કહેવાય છે. રાશીચક્રમાં બાર રાશીઓ આવેલી છે. એક ધ્યાનાકર્ષક વાત એ છે કે આપણે આપણાં અંગુઠા વડે હાથની આંગળીઓના વેઢાઓ દ્વારા ૧૨ની ગણતરી સહેલાઈથી કરી શકીએ છીએ ! (બારના પાયા પર ગણતરીઓની પદ્ધત્તિ પ્રસિદ્ધ થવાનું આ પણ એક કારણ હશે ?) ભારતીય ન્યાય વ્યવસ્થામાં જ્યુરીની જોગવાઈ નથી પરંતુ ઘણા દેશોમાં જ્યુરીની જોગવાઈ છે, જ્યુરીના વિચારનો છેડો પ્રાચિન ગ્રીસ સુધી પહોંચે છે, પરંતુ આ જ્યુરીના સભ્યની સંખ્યા ૧૨ રાખવી તેવો વિચાર છેક વાઈકિંગ સમાજમાંથી ચાલ્યો અને ઈંગ્લેન્ડના રાજા હેન્રી બીજાએ તે અપનાવ્યો. હવામાન શાસ્ત્રના હવાલેથી જણાવાય રહ્યું છે કે બ્યુફોર્ટ સ્કેલ (BEAUFORT SCALE) પર પવનની ગતી ૧ થી ૧૨ સુધીના માપે દર્શાવાય છે જેમાં ૧ = શાંત વાતાવરણ અને ૧૨ = વાવાઝોડું (HURRICANE). હીટલરની હજારો વર્ષની નાત્સી હકૂમતની કલ્પનાનાં બણગા પણ લગભગ ૧૨ વર્ષના નાત્સી શાસન બાદ હવા થઈ ગયેલા ! અગાઉ આપણે ૨૦૧૨ને ઉલ્લેખતા તાજેતરના કેટલાક ચલચિત્રો વિશે તો જાણ્યું કિંતુ અગાઉ ૧૯૫૭માં ’૧૨ એંગ્રીમેન’ (બાર ક્રોધીત માણસો !) અને ૧૯૯૫માં ’ટ્વેલ્વ મંકી’ (બાર બંદર !) જેવા ૧૨ના અંકનો ઉલ્લેખ હોય તેવા ચલચિત્રો આવેલા. (હજુ ભેજાનાં ૧૨ ન વાગ્યા હોય તો વધુ શોધખોળને અવકાશ છે !! અથવા ૧૨-૧૨-૧૨ માટે પણ અનામત રાખી શકો છો !)
હવે આપણી માતૃભાષાના પ્રકાશમાં, ભ.ગો.મં.ના આભારસહઃ થોડી બારાયણ: બાર =
* અવાજ; ભડાકો * આનંદ; મોજ; ચેનબાજી; જાહોજલાલી * આશ્રયસ્થાન; આશ્રયનું ઠેકાણું * ઊપજ; આવક * ગર્ભાવસ્થા માંહેનું છોકરૂં; ફળ * તડાકો; ધાર્યું થવું તે * ( સંગીત ) તાલસ્તંભ; સંગીતલેખનમાં સ્વરોની વચ્ચે કાઢેલી । આવી ઊભી લીટી * દાખલ થવું તે; પ્રવેશ * પરિણામ * બંદૂકમાં ભરેલો દારૂનો જથ્થો * ભાર; બોજો; ભારણ; * માર્ગ * રજા; પરવાનગી * વાર; દિવસ; * અનાજનું ડૂંડું * કોર; હાંસિયો; ધાર; કિનાર * ઢીલ; વાર * પૂર * ફરતી કરવામાં આવતી વાડ * વખત; કાળ; સમય * સિપાઈઓની હાર કે પંક્તિ * સોળ વર્ષની નાની ઉમરની બાળા * આંગણું * જળ; પાણી * પાક; પેદાશ; ફાલ * બારણું; દરવાજો; દ્વાર; ડેલી * વહાણ * વકીલસમુદાય, એ ઉપરાંત પણ ઘણા અર્થ છે પરંતુ એક અર્થ બહુ જાણીતો છે અને એ છે; દશ ને બે; ૧૨ !!! માત્ર અંક ૧૨ની વાત કરીએ તો તેને ’દ્વાદશ’ પણ કહેવાય છે. અને કેટલીક માન્યતાઓમાં મૃતક પાછળ બારમા દિવસે કરાતી ક્રિયાઓને પણ બારમું કહે છે. ’ૐ नमो भगवते वासुदेवाय’ એ બાર અક્ષરોનો એક વૈષ્ણવી મંત્ર છે જેને દ્વાદશ મંત્ર કહે છે. જૈનોમાં ભેગાથી પાંચ ઉપવાસ કરવા તેને દ્વાદશ કહે છે. અને વિક્રમસંવતના પંચાંગ પ્રમાણે પ્રત્યેક પખવાડીયાની બારમી તીથી એટલે દ્વાદશી કે બારશ.
આટલી કથા કરી જ છે તો ચાલો કેટલીક કહેવતો પર પણ નજર નાંખીએ: અર્થ અને વધુ માટે તો સાદર ભ.ગો.મં.નું શરણ લેવું.
* બાર કોળાં ને તેર લાગા
* બાર ગાઉએ બોલી બદલે
* બાર વાગી જવા
* બાર બાપની વેજા
* બારે વહાણ બૂડવાં
* બારે બુદ્ધિ ને સોળે સાન
* બાર મણની સંભળાવવી
* બાર વર્ષે બાવો બોલ્યો
અને એક કહેવત તો અમે નાના હતા ત્યારે ઉખાણાંરૂપે પુછાતી ’બાર હાથનું ચીભડું અને તેર હાથનું બી’ બોલો એ વળી શું ?
તો ચાલો વળી પંચાંગશાસ્ત્ર તરફ પાછા વળીએ,
જ્યોર્જીયન પંચાંગ પ્રમાણેનું આ ૨૦૧૨નું વર્ષ અન્ય કેટલાક પંચાંગ પ્રમાણે =
વિક્રમ સંવત ૨૦૬૮-૨૦૬૯ (એક આડવાત, ભારતમાં ગણીને કુલ ૩૪ સંવત છે.)
ભારતીય રાષ્ટ્રીય પંચાંગ ૧૯૩૪-૧૯૩૫ (શક સંવત)
યુગાબ્દ ૫૧૧૩-૫૧૧૪
પારસી શહેનસાઈ સં ૧૩૮૧-૧૩૮૨
પર્શિયન ૧૩૯૦-૧૩૯૧
શીખ નાનકશાહી ૫૪૩-૫૪૪
વિએતનામીઝ ૪૬૪૯
ઈસ્લામિક ૧૪૩૩-૧૪૩૪
હિબ્રુ ૫૭૭૨-૫૭૭૩
ચાઈનીઝ ૪૬૪૯ (ડ્રેગનવર્ષ)
આ વર્ષે મધર્સ ડે અને ફાધર્સ ડે બંન્ને રવિવારે જ આવશે ! (મે, ૧૩; જુન, ૧૭) અર્થાત ઘરે રહી સેવા કરવાનો અવસર પ્રાપ્ત થશે ! આ વર્ષ રવિવારથી શરૂ થશે અને સોમવારે પુરું થશે ! (વાહ ! વાહ !! અશોકજી, દરેક લિપયર્સમાં આમ જ થાય !!) વર્ષ ૨૦૧૨ના કુલ દિવસો થશે ૩૬૬, રવિ, સોમ થશે : ૫૩ (ત્રેપન) અને મંગળ, બુધ, ગુરુ, શુક્ર, શની : ૫૨ (બાવન). તો મિત્રો આ માત્ર ઉપરછલ્લી બે હજાર બારાયણ હતી. સૌનો ઉત્સાહ વધે અને આગળ વર્ષભર આ વિષયે શોધકાર્ય ચાલુ રહે તો સૌને મજા મજા રહે (અને પેલી ૨૧-૧૨-૨૦૧૨નો તણાવ થોડો હળવો બને !) એટલા માટે જ આ નાનકડો પ્રયાસ હતો. ચાલો ફરી એક વખત સૌને નવવર્ષની હાર્દિક શુભકામનાઓ.
Dear sir
very very nice information
&
Happy New Year 2 U
LikeLike
|| Happy New Year ||
આભાર ડૉ.સાહેબ.
LikeLike
બારાયણનું પારાયણ!
LikeLike
આભાર દીપકભાઈ,
આ પારાયણ પરથી જ બારાયણ શબ્દ લાધ્યો !
LikeLike
આજના મંગલ પ્રભાતે આપને તથા આપના કુટુંબીજનોને
૨૦૧૨ ના મંગલ નુતન વર્ષની શુભ કામના
આવ્યો છે આજ અવસરીયો રૂડો આનંદોને ઉલ્હાસોને
બે હજાર બારનાં વધામણાં કરી (૨) નવા વરસને વધાવો ને… આવ્યો.
સ્વપ્ન જેસરવાકર ( પરાર્થે સમર્પણ)
LikeLike
|| Happy New Year ||
આભાર ગોવિંદભાઈ.
LikeLike
nava vash ni subhkamnao.uttam lekhan kary. aabhar.
LikeLike
સ્વાગત અને આભાર, ગોસાઈ સાહેબ !
LikeLike
“બારાયણ” !!!! ચાલો બ્લોગ જગતને એક નવો “કથાકાર” [બાવો] મળ્યો :-), 😡
– નવ [બાર નહી?:-D] વર્ષની હાર્દિક શુભકામનાઓ –
LikeLike
હંમમમમ….
તો હવે હું કથાકાર થઈ ગયો એમને ??
જો કે મને તેં [બાવો] શબ્દ વાપર્યો માટે શંકા જાય છે, તો ખાનગીમાં પુછી લઉં !!!!
આ ઉપર પધાર્યા તે ગોસાઈ સાહેબ આપણા PG જ છે ? તો પછી નાળીયેર એમની ઢારૂં ફેંકાયેલું ગણું 🙂
LikeLike
હા ભાઇ હા ! g9 :-), તને કઈ કહેવાની હિંમત થાય ખરી ! 😕
LikeLike
સૌ મીત્રોને વર્ષ 2012ની હાર્દીક શુભેચ્છાઓ…
LikeLike
આભાર ગોવીંદભાઈ
|| Happy New Year ||
LikeLike
બે હજાર બારાયણ સુખદાયી નીવડે. હાર્દિક શુભેચ્છાઓ.
LikeLike
આભાર બાપુ,
|| Happy New Year ||
LikeLike
Ashokbhai and family
Happy New Year
Very nice artical……. keep writing…….
LikeLike
સ્વાગત અને આભાર, નિતિનભાઈ.
|| Happy New Year ||
LikeLike
નવા બાવાજીને ધન્યવાદ સહ સ્વાગતમ્ !!
હવે તમેય લાંબા લેખાળા બનવાના. બાપુ પછી દીપકભાઈ ને હવે તમે. જામશે હવે ! થાવા દ્યો તમતમારે. નવા વરસની શુભેચ્છાઓ.
LikeLike
આ વખતે જુનાગઢ ગયો ત્યારે શ્રી દીપકભાઈની મદદથી હું અશોકભાઈને મળી શક્યો. તેઓ સમય લઈને છેક વાડલા આવ્યા. તેમની વાચનભૂખ વિશે જાણીને હું મુગ્ધ થયો. આવી ધખના જે ક્ષેત્રની થાય તે ક્ષેત્રમાં માણસનું તેજ વધે જ.
આપણે આશા રાખીએ (ને હું વીનંતી કરું ) કે એમની આ વાચનભૂખ જે એમના એક વડીલે જગાડી હતી તે બધી વાતો આપણને કહે. આપણા કૅપ્ટન જે ડાયરી નેટ પર લખે છે તેવી ડાયરીમાં અશોકભાઈની લેખિની જરૂર ખીલશે.
અશોકભાઈ, તમે વાઘનું નહીં, કમળ કે હંસનું પ્રતીક રાખી શકો તેવી તમારી કલમ થાય તેમ છે. તમારી વાચનભૂખ, તમને હવે, લેખનખણ (ખજવાળ) આપે તેવી શુભેચ્છા અને આશા છે.
LikeLike
શ્રી જુગલભાઈ,
હું તો માત્ર વાહન બન્યો. અક્ષર દેહથી તો આપણે સૌ બહુ નજીક આવી ગયા છીએ. સદેહે મળવાનો લાભ તો માત્ર તમને અને અશોકભાઈને મળ્યો, એની અદેખાઈ પણ છે. વાઘની બાબતમાં તમારૂં સૂચન સાચું છે. વાઘ તો કુરુક્ષેત્રમાં ગરજે છે.અશોકભાઈ તો ‘મર્માળા હાસ્ય’નું કોઈ પ્રતીક પણ રાખી શકે.
LikeLike
આભાર, શ્રી. જુગલકીશોરભાઈ તથા દીપકભાઈ.
આ ’લેખાળા’ શબ્દ બહુ ગમ્યો !! ઢેખાળા સાથે પ્રાસ મળે છે ! અને દીપકભાઈના પ્રયત્ને આપને મળવાનું સૌભાગ્ય પ્રાપ્ત થયું તે માટે દીપકભાઈનો ખાસ આભાર. પછીના લેખમાં સૌ મિત્રો સાથે સંસ્મરણો વહેંચીશું તેમાં આપના આદેશ અનૂસાર પેલી વડીલ વાળી વાત પણ મુકીશ.
અને હા, આપ બંન્ને વડીલમિત્રોએ માર્ગદર્શન કર્યું છે તો તેને શિરોધાર્ય કરી આ નવા વર્ષમાં ’વાઘ’ને વિદાય આપી ’કંઈક’ નવું પ્રતીક લાવું. (કયું ? એક દિવસ માટે સસ્પેન્સ રાખીશ !!)
ખુબ ખુબ આભાર.
LikeLike
HAPPY NEW YEAR, ASHOKBHAI
DR. CHANDRAVADAN MISTRY
http://www.chandrapukar.wordpress.com
Hope to see you on Chandrapukar in 2012
LikeLike
આભાર ચંદ્રવદનભાઈ.
આપને પણ નવા વર્ષની હાર્દિક શુભકામનાઓ.
LikeLike
અશોકભાઈ સારા કટાક્ષ લેખ લખી શકે છે. વાઘ હસતો હોય તેવું પ્રતીક રાખી શકાય,તે માટે ચેલા મુનશીની મદદ લઇ શકાય.
LikeLike
બાપુ, આપના ચેલાને કામ સોંપ્યું છે !!! તેથી હમણાં બે-ચાર દહાડા ત્રાસ રહેશે. (એણે દશ મીનીટમાં બે ફોટા તો ફેરવ્યા 🙂 જોઈએ અમારો એકાદો જામે તેવો ફોટુ બનાવી શકે કે કેમ !!!
LikeLike
એક અર્થ રહી ગયો..
દારૂનું પીઠું અથવા દારૂ પીરસવાની જગ્યા !
બાર બોય ન હોવા છતાં આ સૂઝ્યું !!
——-
તમને પણ શબદ રમતમામ રસ લાગે છે.
– હાદ પર ઢગલાબંધ છે ; અને ટાઈમ પાસ કરવા મન થાય ત્યારે, ત્યાં પણ પ્રદાન કરવા ઈજન છે !
LikeLike
બાર બાર દિન યે આયે..
LikeLike
બાર બાર દિન યે આયે…. ! આવશે ને દાદા, બાર-બાર-બાર આવશે !!
અને હા, ’બાર’નો રહી ગયેલો અર્થ ખરો પકડ્યો ! જો કે મને થયું કે ચોખવટ કરીશું તો કો‘કને લેખમાં 31stની સ્મેલ આવશે !!!! એથી ગૂઢાર્થમાં રાખી દીવ અને દમણનાં નામ લખ્યા ! મજા આવી, આભાર.
LikeLike
અશોકભાઈ,
નવાં વર્ષની શુભેચ્છાઓ.
૧-તમારું કહેવું: સંયુક્ત રાષ્ટ્રસંઘ દ્વારા આ વર્ષને ’આંતરરાષ્ટ્રીય સહકારી વર્ષ’ જાહેર કરાયું છે. આ વર્ષને ’આંતરરાષ્ટ્રીય સાતત્યપૂર્ણ ઊર્જા વર્ષ’ પણ જાહેર કરાયું છે.
અમારું કહેવું: આપણે ત્યાં તો અનેક સહકારી બેન્કોએ ઉઠમણાં કરીને સહકારી વર્ષ કેડાદાનું ઉજવી નાંખ્યું છે. ઉર્જાની વાત કરીએ તો આ વરસે ઉર્જાની ખૂબ જ જરૂર પડવાની છે. કારણ કે જન લોકપાલ બિલ પાસ કરાવવાનું છે.
૨-તમારું કહેવું :ડ્રેગનવર્ષ સુઃખ, સમૃદ્ધિ અને દીર્ઘાયુષ્ય લાવે છે.
અમારું કહેવું: ડ્રેગનને જે લાવવું હોય તે ભલે લાવે. પણ એના દેશની સરહદમાં રહીને! ડ્રેગન સરહદ ન ઓળંગે તેવી આશા રાખીએ!
૩-તમારું કહેવું: * જુલાઈ ૨૭ – ઑગસ્ટ ૧૨, લંડન ઑલિમ્પિક્સ. આ સાથે લંડન પ્રથમ એવું શહેર બનશે જેણે ત્રણ ત્રણ વખત ઑલિમ્પિક રમતોત્સવની યજમાનગીરી કરી હોય.
અમારું કહેવું: તોય કોઈ જેલભેગું થયું? યાદ કલામાડીકી આયેગી…
૪-તમારું કહેવું: પરંતુ આ વર્ષે તો ’સંભવામિ યુગે યુગે’ નું વચન આપનારો પણ ખરેખર પહેલી એપ્રિલે સૌને એપ્રિલફૂલ ન બનાવી જાય અને સૌના હૃદયમાં પ્રગટે તેવી પ્રાર્થના ! (ન સમજાયું હોય તો કેલેન્ડર જોવા કૃપા કરશો !)
અમારું કહેવું: કેલેન્ડર જોયું. જય શ્રી રામ! બાકી રાખીએ … બીજાં માટે .
૫-તમારું કહેવું: * બાર વર્ષે બાવો બોલ્યો
અમારું કહેવું: સંસદના તાજેતરના સત્રના છેલ્લા દિવસે રાત્રે બાર વાગે બાવાશ્રીએ સમય સમાપ્તિની ઘોષણા કરીને સહુને ઘરભેગા થવાનું કહી દીધું!
કલાકારોને શરમાવે તેવું કળા-પ્રદર્શન નેતાઓએ કરી બતાવ્યું!
.. અટકીએ? કે ફરી મળીએ?
LikeLike
શ્રી.યશવંતભાઈ, આપને પણ નવા વર્ષની હાર્દિક શુભકામનાઓ.
આ આવું બધું (મુદ્દા ૧ થી ૫ જેવું !!) અમને કેમ નથી સુઝતું ?! કદાચ હજુ ’અસર’ થતા દાયકાઓ લાગશે ! માટે જ અટકશો નહીં, કૃપા કરી અમને ’અસર’ થાય તે પરમાર્થે પણ મળતા રહેશો. આભાર.
LikeLike
અશોક તારી વચન ભૂખ અને એને પચાવવાની અને યાદ રાખવાની શક્તિ અને લોકો સુધી પહોંચાડવાની ધગશ ઉપર વારી જવાય છે .ખુબ ખુબ પ્રગતિ કરીશજ એવી આતાની આગાહી છે. અને હૃદયમાંથી પ્રગટ થએલા વચનો પરમેશ્વર સાર્થક કરતો હોય છે . ધન્યવાદ
LikeLike
એ….તમ જેવા વડીલોના આશિર્વાદ છે આતા.
ઘણો આનંદ થયો. આભાર.
LikeLike
વાહ ભાઈ વાહ, જબરજસ્ત બારાયણ માંડી છે તમે તો. પણ છેલ્લે પેલું લખવાનું ભૂલી ગયા કે………. દર મહિનાની બારમી તારીખે બપોરે બાર વાગ્યે આ બારાયણનો બાર વાર પાઠ કરવાથી મનોવાંચ્છિત ફળ પ્રાપ્ત થાય છે. ઈતિ શ્રી અશોકરચિત બ્લોગપુરાણ મધ્યે બારાયણ નામક દ્વાદશો અધ્યાય સંપૂર્ણ….!
અંગ્રેજી વર્ષના સાલમુબારક ભાઈ!
LikeLike
આભાર, ધવલભાઈ. સાલમુબારક.
જો કરી ને !!! સાવ સાચું કહ્યું, માળું એટલું લખવાનું રહી ગયું હોં !
જો કે હવે આપની પવિત્ર કલમે એ લખાઈ ગયું છે તો સૌ મિત્રોને એ પ્રમાણે કરવાથી ભગવાન બે હજાર બારાયણની કૃપાથી મનોવાંચ્છિત ફળ પ્રાપ્ત થાય તેવી શુભકામના ! (આપણે ભાગીદારીમાં કથાકારી કરવા જેવું છે 🙂 )
આભાર.
LikeLike
ના ભાઈ, ભાગીદારીમાં ધંધો કરતાં જ નથી આપણે.
LikeLike
Happy new year sir…
મેં બ્લોગસ્પોટ માં રમુજ માટે એક બ્લોગ બનાવેલો છે, સમય મળે ત્યારે મુલાકાત લેશો
http://e-laughingclub.blogspot.com/
LikeLike
શ્રી.ધર્મેશભાઈ,
સ્વાગત અને આભાર.
LikeLike
વાહ, વાઘને ભગાડીને તમે છેવટે સરસ પ્રતીક મૂકી દીધું. બાળકનું બાળક ને હાથમાં ધોકો; પાછળ ડ્રેગનપૂંછ ને મોં પર ખીલખીલાટ !!
આગળ લખવાનું ટેબલ પણ ભાગ ભજવી જાય છે. લાગે છે કે ગુરુઓનેય આ છોરો છોડશે નહીં !!!
LikeLike
આભાર, જુગલકીશોરભાઈ.
આ ’હાથમાં ધોકો’ ?? અરે સાહેબ “કલમ” છે ! (જો કે વિદ્વાનો તેને બરછી કરતાંએ ધારદાર ગણાવે છે એ અર્થમાં ધોકા જેવું શસ્ત્ર ખરું !)
આપને આ પ્રતિક ગમ્યું, આભાર. જો કે મારે આ પ્રતિક શોધી આપવા માટે ’મુન્શીજી’નો આભાર માનવો જ પડે. (તેણે મને ટાયગરમાંથી ટાલિયો બનાવી દીધો 🙂 )
LikeLike
થોડી “માથાફોડ” કર્યા પછી આ ફોટો હાથ લાગ્યો, કામ થોડું અઘરું તો હતું જ “ટાઇગર” ને ક્યા અવતાર માં ફેરવવો પરંતુ ગુરુજી અને વડીલોના સુચનોએ સરળ બનાવી આપયુ,
“મર્માળું હસતો હોય અને પાછો જીનીયસ હોય” એ..ને… આ “ટાલીયા” છોરા પર પસંદગી ઉતારી.
LikeLike
એ બહાનેય તમે એક સારા કામમાં ભાગીદાર બન્યા. ભાઈબંધને તમે વાઘમાંથી બાળક બનાવી દીધો. ધન્યવાદ.
LikeLike