તંદુરસ્ત રહેવું છે ? પ્રેમમાં પડો !


મિત્રો,  નમસ્કાર.
હમણાં એકાદ દિવસ પહેલાંના વર્તમાનપત્રમાં એક નાનકડા સમાચાર વાંચ્યા, જેમાં બ્રિગહામ યંગ યુનિવર્સિટીના જૂલિયન યંગ લન્સ્ટેંડના હવાલાથી જણાવવામાં આવ્યું હતું કે (સમાચારમાં આવી ભાષા વાપરવી પડે !  કશી જ જવાબદારી લખનારની રહે નહીં !)  “તંદુરસ્ત રહેવું હોય તો પ્રેમમાં પડો !”
પ્રથમ અહીં સમાચારમાં ઉલ્લેખાયેલી વિગતો પણ વર્તમાનપત્રનાં હવાલાથી જણાવી દઉં,  પછી આપણું ચિંતન આગળ ધપાવીશું.  એમ કહેવાયું છે કે; પ્રેમને કારણે મગજની ડૉપેમાઇન રિવૉર્ડ સિસ્ટિમ સક્રિય બને છે.  જે એક શક્તિશાળી ન્યુરોટ્રાન્સમીટર હોય સુખ અને ઉલ્લાસની અનુભૂતિ કરાવે છે.  પ્રેમભર્યા ગાઢ આલિંગનને લીધે મગજમાંથી ઓક્સીટોસીન હોર્મોન ઝરે છે તે તનાવ તથા રક્તદાબ (બ્લડપ્રેશર ભ‘ઇ !)  ઘટાડે છે તથા પીડા સહન કરવાની શક્તિમાં વધારો કરે છે.

હાશ !  આવા અઘરા અઘરા શબ્દો વાંચીને અમારો રક્તદાબ ઉલ્ટાનો વધી ગયો ! હવે આવી અઘરી વાતો કંઈ આપણે પલ્લે તો પડે નહીં,  અને આવા મોટા વૈજ્ઞાનિકો કહેતા હોય (તથા છાપામાં પણ આવી ગયું હોય !)  તો કંઈ ખોટું તો નહીં જ હોય. તેથી અમને થયું ચાલો જરા આપણે આ પર થોડું દેશી સંશોધન કરીએ. અને અમે કર્યું !! (કહે છે ને કે બુદ્ધિશાળીઓ જરા બે વખત વિચાર કરે છે અને મૂર્ખાઓ તુરંત અમલ કરે છે) તારણ એ નીકળ્યું કે વાત સાવ સાચી છે !! (સારું થયું આપનું તારણ પણ એ જ નીકળ્યું નહીં તો શ્રીમાન યંગને ફરી નવેસરથી સંશોધન કરવાનો વારો આવત ! અશોકભાઇ !!)

તંદુરસ્તી અને પ્રેમ (અહીં સંશોધકોએ ખાસ કોઈ ચોખવટ કરી ન હોય, આપણે “પ્રેમ” શબ્દને તેના રૂઢ અર્થમાં જ લેશું OK ?) વચ્ચે અમને પણ બહુ નજીકનો સંબંધ જણાયો છે. કેટલાંક મુદ્દાઓ હું અહીં આપું છું અને કોઈ ચુકાઈ ગયેલા લાગે તો ’સ્વાનૂભવપ્રાપ્ત મહાનુભાવો’એ પૂરક માહિતીરૂપે જણાવવા તેવી નમ્ર વિનંતી પણ છે જ !

પ્રથમ તો જો આપ પરણેલા હોય અને પાછાં તંદુરસ્ત બનવાનાં ધખારા પણ ઊપડ્યા હોય તો યાદ રાખશો કે આગ લાગે તેનો ધુમાડો તો કદાચ બની શકે કે સંતાડાય પણ જાય પરંતુ આપની આ તંદુરસ્તી કાજેની કસરતો ધર્મપત્નીથી છાની કદી નહીં રહે ! બસ, જેવી તેમને જાણ થઈ કે સમજો આપનું શરીર સૌષ્ઠવ માંડશે વધવા ! શરૂઆત કદાચ છણકા-ઠણકા જેવી વૉર્મઅપ કસરતથી થશે પણ આર્યનારીઓને મુક્કા-લાત, વેલણ, ધોકા જેવી સખ્ખત કસરતે પહોંચતા બહુ વાર નહીં લાગે ! આપના શરીરનાં વિવિધ સ્નાયુઓ અને હાડકાઓને આ રોજીંદી કસરત મજબૂત બનાવશે !! નિશાન ચૂકવવાની લાયમાં આપની તમામ ઈન્દ્રિયો પણ સચેત બની અને કાર્યરત થવા માંડશે તેમજ અંતે જય રણછોડ કરવા માટે પગનાં સ્નાયુઓએ પણ મજબૂત બનવું પડશે. આમ રોજબરોજની આ દોડવાની કસરત શક્ય છે આપને કદાચ વિશ્વનાં ખ્યાતિપ્રાપ્ત દોડવિર પણ બનાવી દે !! (દોડની હરીફાઇમાં પ્રથમ આવેલા એક ખેલાડીને પત્રકારોએ અન્ય ઊગતા ખેલાડીઓના લાભાર્થે રહસ્ય પૂછ્યું તો તેઓશ્રીએ જણાવ્યું કે; હું દોડ શરૂ થયાની સાથે જ વિચારૂં છું કે, રોજની જેમ જ, પાછળ પત્નીજી વેલણ લઈને આવે છે ! અને બસ, મારા પગ જાણે હવામાં ઉડવા માંડે છે 🙂 ) 

આ તો થઈ પરણેલા હોવા છતાં તંદુરસ્ત રહેવાનાં ધખારા રાખતા આરોગ્યપ્રેમીઓની વાત. પણ અપરણિત આરોગ્યપ્રેમીઓને પ્રેમ કરવાથી લાભ કઈ રીતે થાય ? (એ આગળ વર્ણવેલા ડૉપેમાઇન વગેરે વગેરેને ભૂલી જાઓ ભાઇ, આપણે તો વાસ્તવિક સંશોધન કરવાનું છે !) તો, જે કાર્ય પેલાઓને પત્ની કરી આપે છે તે આવડા આઓને કન્યાઓનાં ભાઈઓ અને પપ્પાજી (અહીં ’ઓ’ લગાડવાનો નહીં ! આરોગ્યની સાથે સાથે ભાષાનું પણ ધ્યાન રાખવાનું !) કરી આપશે. અહીં પણ પ્રથમ તો પંચેન્દ્રિય સજાગ રહેવાનું શીખશે, પ્રેમાલાપ દરમિયાન ગલીનાં કોઈ નાકેથી, કોઈ ભાઇ-બહેન પ્રગટતા તો નથીને તેનું પણ ધ્યાન રહેશે. કદાચને જરા પણ શંકા જેવું લાગે તો કઈ તરફ ભાગવું તેવી સત્તત રહેતી ચિંતા ત્વરીત નિર્ણય શક્તિ વધારશે. ઓવરઑલ ગણીએ તો પ્રથમ બેધ્યાનપણે ભટકતો યુવાન હવે શતાવધાની બનવા માંડશે !! આમ સર્વપ્રથમ માનસિક આરોગ્યમાં સુધારો થવા લાગશે અને હજારો સાવધાની છતાં જો ક્યારેક ઝપટે ચઢી જ ગયા (જે પાકું જ સમજવું !) ત્યારે શારીરિક આરોગ્યમાં સુધારો તો પાકો જ છે !! 

’સમજ્યા ! સમજ્યા !! પરંતુ અશોકભ‘ઇ, આ તો બધા વ્યક્તિગત ફાયદા થયા ! આપણે રહ્યા સમાજસેવક !! આ પ્રેમમાં પડનારાઓથી સમાજને કોઈ દેખીતો ફાયદો ખરો ?’
’કેમ નહીં !!’ ઘણા ફાયદા છે પરંતુ આપણું સંશોધન માત્ર આરોગ્યલક્ષી હોય આપણે સમાજના આરોગ્યને લગતો એકાદ ફાયદો પણ અહીં લઈએ. સમાજને સૌથી મોટો ફાયદો એ થશે કે હાલમાં બહુચર્ચિત અને આરોગ્ય માટે ઘણું ગંભીર ખતરારૂપ ગણાતું ધ્વનીપ્રદુષણ ઘટશે !!
’સાલું આ કંઈ પલ્લે ના પડ્યું !’
‘’જુઓ,’  એટલે કે શબ્દશઃ જુઓ જ !!  જ્યારે બે પ્રેમીજનો, વાત કરતા હશે તો, સાવ તેમનાં મોંમાં કાન ખોસી દેશો તો પણ તમને કશું સંભળાશે નહીં ! અરે તેઓ ફોન પર વાત કરતા હશે તો પણ, તમને નજીક ઉભા હોવા છતાં, કશું જ સંભળાશે નહીં ! (બસ અમારો જીવ એકમાત્ર આ વાતે જ બળે છે બાકી અમને આ ’પ્રેમ’ સામે અન્ય કોઈ વાંધો નથી ! સાલું આપણને કંઈ સંભળાય જ નહીં, જાણે સાત-આઠ દાયકા પહેલાંનું મુંગુ પિક્ચર જોતા હોઈએ તેવું લાગે !! આમાં કંઈ મજા નો આવે !)  ટૂંકમાં બાજુનો મહોલ્લો સાંભળે તેટલા મોટા બરાડા પાડતા ઢગાઓ હવે એકદમ શાંત, સાલસ અને ધીમાં અવાજે બોલતા થઈ જશે.  (એક નવું પેટા સંશોધન,  જ્યાં બહુ શાંતિ જણાય ત્યાં સમજવું કે પ્રેમીજનોનો નિવાસ હશે !  કંઈ ખોટી વાત ?)

તો વાત આમ છે ! પ્રેમમાં પડવાથી તંદુરસ્તી પણ વધશે એ સાબિત થઈ ચૂક્યું છે. ક્યાં ? ક્યારે ? કોના ? એ બધા સવાલોનું બહુ મહત્વ નથી. બસ પ્રેમમાં પડો !
(એ…વડીલ ! આમ ઉતાવળા ન થાઓ, હજુ થોડું બાકી છે, પહેલાં પૂરું વાંચતા તો જાઓ !!)
આપણને પણ તંદુરસ્તી વધારવાનો શોખ તો બહુ, પણ આપના પ.પૂ.ધ.ધુ.૧૦૦૮ (આ અમે ખાધેલા ધુંબાનો આંકડો છે !) ભાભીશ્રીએ, અસલનાં વખતનાં, ઘરના દેશી બાજરાના રોટલા અને ઘરનાં દુઝાણાનાં દુધ ખાધેલાં હોય, દાક્તરોની સલાહ હતી કે આરોગ્ય કરતાં વધુ ચિંતા જીવની કરવી ! જાન હૈ તો જહાન હૈ !! પણ જેને આવી કોઈ આડઅસરોનો ભે ન હોય તેમણે બનતી ત્વરાએ શુભસ્ય શીઘ્રમ કરવું. આમે બે-ચાર દિવસોમાં જ મોકો આવે છે ! (શું કહે છે પેલું ’વેલૅન્ટાઇન ડે’, આ વેલૅન્ટાઇન અને વસંતનો પ્રાસ મળતો આવતો નથી લાગતો ?)

તો સૌ મિત્રોને વસંતના આ રુડા આગમનની વધામણી અને મનોભાર, તનોભાર કે ધનોભારની પરવા ન કરતાં માત્ર બાલ્યભાવે આ વસંતોત્સવ માણવા લાગશો તો અમારી જેમ આપને પણ ફળીમાં ઊગેલા ગુલમહોરે ટહુકતી કોયલ કે આજે જ એક છોડને ફૂટેલી નવી કુંપળ પણ પ્રેમનો સંદેશ આપતી જ લાગશે. હજુ એટલાં નસીબદાર છીએ કે વસંતની વધામણી આપવા કોયલ આંગણે આવે છે, કેલેન્ડરમાં જોઇએ ત્યારે જાણ થાય કે હવે વસંત બેઠી, તેટલા કમભાગી તો કુદરત કોઈને પણ ન બનાવે. બસ એટલી અભ્યર્થના. 

Advertisements

26 responses to “તંદુરસ્ત રહેવું છે ? પ્રેમમાં પડો !

  1. અત્યારે હું પ્રેમમાં છું એટલે અહીં મેં જે કોમેન્ટ કરી છે તે તમે સાંભળી(એટલે કે વાંચી) નથી શકતા!

    Like

  2. સરસ ,અભિનંદન
    તંદુરસ્ત રહેવાનું સુંદર ટોનિક પીરસવા બદલ આભાર
    અરે આમો પીરસવાનું ક્યોથી આવ્યું? વાચ પીણું છે ને એટલે

    Like

    • આપનો આભાર, પ્રહલાદભાઇ.
      આ “આમો”, “ક્યોથી” જેવા મીઠા શબ્દો વાંચીને મોં ભરાઇ જાય છે. આપનો આ લહેકો ખુબ ગમે છે. (મારી ભુલ ન થતી હોય તો બોલીનો આ લહેકો ’મેહાણા’ (મહેસાણા) બાજુનો હશે, જરા અમારૂં જ્ઞાન વધારોને સાહેબ.) આભાર.

      Like

  3. દિપકભાઈ
    તમારી વાતમાં મને શંકા પડે છે. મને ખાત્રી છે કે અશોકભાઈ સાથે તમે પ્રેમમાં નહીં જ પડ્યા હો – અને સાચો પ્રેમી ક્યાંય આડો-અવળો કોમેન્ટ કરવા ન જાય તે તો માત્ર ને માત્ર પોતાની પ્રેમિકા સાથે પ્રેમાલાપ કરતો હોય.

    Like

  4. હા… હા…. હાહાહાહા.. હ્હ્હ્હ ઉઉઉઉહ્હ્હ્હ્હ…. [આ મોટે થી હસવાનો અવાજ છે સાથે પેટ માં દુખા વા નો પણ]
    અશોક દવે સોરી અશોક”જી”
    અવળે પાટે ચડી ગયો તુ વેપાર કરવા નહીં “હાસ્ય લેખક” થવા સર્જાયો છો,[આ જોક નથી] શુ સરસ શોધી કાઢયુ ! હવે મહત્વ ની વાત એ છે કે “તારી સુંદરતા નો સોરી
    તંદુરસ્તી નો રાઝ હવે મને જડી ગયો !!!!!!!!!!!!!!!”

    Like

    • ગુજરાતીમાં એક કહેવત છે; ’કાથરોટ કુંડાને હસે ! કે તારું મોં પહોળું !!’
      તારી તંદુરસ્તીના રાઝ જાહેર કરવા માટે પેલો ’અસાન્જે’ (વિકિલિક્સ વાળો !) ક્યારનો પાછળ પડ્યો છે. બોલ તેને સહકાર આપી દઉં 😮 હુ..હા..હા..હા !!!
      ડર નહીં, મજાક કરૂં છું 🙂 આભાર મુન્શીજી.

      Like

  5. વેપારમાંથી જ શીખ્યા લાગે છે.ભાઈ તંદુરસ્ત રહેવું હોય તો થોડું જોખમ ઉપાડવું પણ પડે.એના ટેન્શનની પણ મજા કઈ ઓર હોય છે.ઘેર ખબર ના પડે તે માટે ચાલાકી જોઈએ.એમાંથી બ્રેઇનનો વિકાસ થાય.સાહસ નો અનુભવ થાય.

    Like

    • આ થઇ, જેની જોતાતા રાહ તે, એક્સપર્ટ કોમેન્ટ !!!
      આભાર બાપુ. અર્થાત અમારૂં સંશોધન બરાબર છે ! શારીરિક અને માનસિક વિકાસ તો થાય જ. (જો કે મને આપની આ પ્રોત્સાહક દાનતમાં કચરો કેમ દેખાય છે ? હાડકાનાં દાક્તરો સાથે કંઇ સેટિંગ તો નથીને ગોઠવ્યું 🙂 )

      Like

  6. બહુ પ્રચલીત એવી હરીન્દ્ર દવેની પેલી પંક્તિના (હવાલે) કહી દવ

    ” તમે પ્રેમની વાતો કરજો, અમે કરીશું પ્રેમ !”

    જો જો વાત બહાર જાય નહીં, નહીંતર મારે ઘરમાં જવાનું અને પછી બહાર નીકળવાનું ભારે થઈ પડશે બાપલા!

    Like

  7. શ્રી વિવેકભાઇ, ગોવિંદભાઇ, મુર્તઝાભાઇ તથા મિતાબહેન, આપ સૌ મિત્રોનો ખુબ આભાર.

    Like

  8. અશોકભાઇ ખૂબ સરસ હાસ્યલેખ અને આરોગ્ય લેખ. લેખ અને પ્રતિભાવો વાંચવાની મજા આવી. સાથે આપે છેલ્લે ખૂબ સરસ ઉત્તમ વાત કહી કે કેલેન્ડર જોઇને વસંતની વધામણી કરવી પડે તેવા કમભાગી ના બનાવે. કોઇપણ ભાર વિના વસંતને બાલ્યભાવે માણીએ. કુદરતના પ્રેમના સંદેશને વધાવીએ.

    Like

    • આભાર, મિતાબહેન. શ્રી રાજેન્દ્ર શુકલનાં શબ્દોમાં કહું તો;
      ” પંખીઓ પાગલ હવે બનતાં નથી, ગાતાં નથી,
      વૃક્ષ તો ઝૂલે છે, પણ એ વાયરા વાતા નથી |
      સાત સાગર ઘૂઘવે છે આંખનાં છેડા ઉપર,
      કોઇ ક્ષણની છીપમાં મોતી ભલે થાતાં નથી” ||
      બસ ઘૂઘવાટ ન શમે તે માટેના આ નાના નાના પ્રયાસો છે ! આભાર.

      Like

  9. વાહ અશોક્ભાઈ+દિપકભાઈ વાહ, “સોનામાં સુગંધ” ભેળવી દિધી….. તમે તો ભારે હોં…!! જો કે દિપકભાઈ અને આપની વચ્ચે અને આપણા સહુ વચ્ચે અહિ શુધ્ધ શાકાહારી ભ્રાતૃપ્રેમની ગંગા વહી રહી છે એનો “ટેશડો” મધમીઠો લાગે છે અને તંદુરસ્તી સાચ્ચે જ વધી રહી છે. વાહ…. અતિ સુંદર….

    Like

  10. કાઠીયાવાડનું પાણી ભાઈ, અને તેમાં પણ પોરબંદર, જ્યાં સાહસ ની કમી જ ક્યાંથી હોય?

    હાસ્યરસ સાથે તંદુરસ્તીનું રહસ્ય જાણી આનંદ થયો.

    Like

  11. શ્રી મિતાબહેન, રાજેશભાઇ, રાજનીભાઇ, ગોવીંદભાઇ તથા વિનયભાઇ.
    આપ સૌ મિત્રોનો હાર્દિક આભાર.
    “વાંચનયાત્રા”નાં સૌ મિત્રોને આજના આ પ્રેમપર્વ નિમિત્તે “હેપ્પી વેલૅન્ટાઇન ડે”

    Like

  12. અશોકભાઇ,
    હુ તો પ્રેમમાં નથી પડ્યો(જેવા મારા (સારા 😛 )નસીબ) તો પણ છુ તંદુરસ્ત હોં…

    બાકી આપની લખવાની શેલી જોરદાર છે હો ભાઇ…

    Like

  13. અશોકભાઇ ખૂબ સરસ લેખ . લેખ અને પ્રતિભાવો બંને વાંચવાની મજા આવી, અને હા … બીજી એક વાત …પ્રેમ અને સુંદરતા વચ્ચે કોઈ અજબ નાતો તો છેજ ….. પ્રેમમાં બધુય સુંદર ભાસે છે અને પ્રેમમાં પડેલી હરેક વ્યક્તિ સુંદર દેખવા લાગે છે …beauty at its best scientifically proven fact ! તેથીજ વસંત કામણ કરી જાય છે …. વાસંતી વાયરા માદક લાગે છે … તેથીજ Valentine day પર કહેવાતું હશે ને … love is in the air !

    Like

    • “love is in the air !” well said.
      આભાર પારૂબહેન, રવિન્દ્રનાથ ટાગોરની એક વાત યાદ આવી જેમણે કહેલું કે અસુંદર રહેવું તે પણ એક પ્રકારની સુક્ષ્મ હિંસા છે ! (આવું તેમણે ગાંધીજીને કહેલું તેમ વાંચ્યુ છે.)
      ” ભરકર ફૂલો સે દામન જબ, વોહ અપને પાંવ બઢાતી હૈ |
      હર નક્શે-કદમ પર હોનેકો કુરબાન વસંત આ જાતી હૈ || — ’અલમ’

      Like

  14. ખૂબ સરસ હાસ્યલેખ અને આરોગ્ય લેખ.
    Enjoyed reading it. Different style 🙂

    Like

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s