વાઘ જ શા માટે ?


Bengal tiger

Image via Wikipedia

નમસ્કાર, મીત્રો.

આમ તો અહીં  હંમેશ મુજબ એક ગંભીર લેખ આવવાનો છે. પરંતુ આ વચ્ચે જરા જરૂરી ચોખવટો કરવી પડે છે.  મુળ તો અમારી (મારી !) સામે ઘણા પ્રશ્નો આવ્યા તેથી આ લેખ લખવાની (અને આપે વાંચવાની !) તકલીફ લેવી પડી. જો કે મને આશા છે કે આપને તો આ વાંચવામાં આનંદ આવશે જ, અને કોઇને મનમાં કશો પ્રશ્ન હશે તો સમાધાન સાંપડશે. આમે મારે અલગ અલગ જગ્યાએ જઇ એકને એક સમાધાન આપે રાખવું એથી તો સારૂં કે અહીં જાહેરમાં જ ચોખવટ કરીએ.

પ્રશ્ન ૧ = નામ અશોક છે તો બધું મજાકમાં જ કાઢતા હશું ?

જવાબ ૧ = અમારી હજી એટલી લાયકાત નથી કે બધે જ મજાકો કરી શકીએ ! હા, ક્યારેક યશવંતભાઇની દેખાદેખીમાં અમે પણ અમારા બ્લોગ પર આ વિષયે હાથ અજમાવવાનો પ્રયાસ કરીએ ખરા. પરંતુ અન્ય બ્લોગ પર કોમેન્ટ તો લેખના વિષય પર આધારીત જ આપીએ. જ્યાં ’હાસ્ય’ કે તેની સમાનાર્થી  ટેગ હોય કે લેખકશ્રીએ મજાક માટે જ લેખ લખ્યો હોય ત્યાં હળવી વાતો લખીએ ખરા. બાકી કોઇ પણ ગંભીર વિષય પરના લેખમાં અમે સંપૂર્ણ ગંભીરતા અને જવાબદારીપૂર્ણ લખાણ જ કરીએ છીએ. (જેથી અમે છીએ (??) તે કરતા થોડા વધુ જ્ઞાની દેખાએ !)

પ્રશ્ન ૨ = અમે ઓળખચિહ્ન તરીકે વાઘ જ કેમ રાખ્યો ?

જવાબ ૨ = સૌથી મોટું કારણ એ કે તે ભારતનું રાષ્ટ્રિય પ્રાણી છે. અને હવે તો વિશ્વ આખું ’વાઘ બચાવો’ (Save tiger) ના નારા લગાવે છે. મનુષ્ય પણ એક પ્રાણી (સામાજીક !) જ છે તેથી એ નાતે પણ અમે રાષ્ટ્રિય પ્રાણીને પ્રતિકરૂપે પસંદગી આપી. જો અમે મનુષ્યરૂપી પ્રાણીને બદલે પક્ષી હોત તો મોર કે પુષ્પ હોત તો કમળ અને વૃક્ષ હોત તો વડ ને પણ ચોક્કસ પ્રાધાન્ય આપત !  શું આમા આપને અમારો દેશપ્રેમ અને પ્રકૃતિપ્રેમ નથી દેખાતો ?

બીજું કે અમે પણ ગાંધીજીના ગામમાં જ જન્મેલા તેથી અહીંસા પ્રત્યે સ્વાભાવિકજ અમને વધુ શ્રદ્ધા રહી છે. અને વાઘ માણસ કરતા તો ઓછું હીંસક પ્રાણી છે ! (માનવામાં ન આવે તો ભુપેન્દ્રસિંહજીનો આ લેખ ફરી વાંચી જવો)

 આમે દરેક વ્યક્તિનો કોઇ આઇકોન હોય છે. અમારો તો ફેમિલી આઇકોન છે ! “વાઘ”. બાપુજીના રૂમમાં જઇએ ત્યારે મજાકમાં કહીએ કે, ’વાઘની બોડમાં જઇએ છીએ !’ તેમના રૂમના દરવાજા પર જ મોટાબધા વાઘના દર્શન થાય છે ! ક્યારેક આપ અમારી દુકાને પધારશો તો દુકાનમાં પણ મોટુંબધુ વાઘનું ચીત્ર દૃષ્ટિગોચર થશે !  તો પછી બ્લોગ પર પણ અમારો બિહામણો ચહેરો રાખવા કરતા વાઘ શું ખોટો ? આમા અમને તો અમારો પશુપ્રેમ જ ઝલકતો દેખાય છે ! આ તો ’ભારતિય વન્યજીવન સંરક્ષણ કાનૂન’ ના પાડે છે, બાકી અમે એકાદ વાઘ તો ઘરે બાંધીએ પણ ખરા !!

’એનિમલ પ્લેનેટ’ વાળાઓએ થોડા સમય પહેલાં એક સર્વે કરેલો તે મુજબ વાઘ એ વિશ્વનું સૌથી લોકપ્રીય પ્રાણી છે ! ત્યાર પછીના ક્રમાંકે અનુક્રમે શ્વાન, ડોલ્ફીન, અશ્વ અને સિંહ આવે છે. (માણસ નામનું પ્રાણી તો મને એ યાદીમાં ક્યાંય દેખાયું જ નહીં !! Sorry !)

અને આમે ટીપુ સુલ્તાન, ઠાકરે કુટુંબ, શ્રીલંકાના તમિલ ટાઇગર્સ અને સ્વયં માતા જગદંબા વાઘેશ્વરીને પણ આ સુંદર પ્રાણી પર વિશેષ અનુગ્રહ રહ્યો છે. અર્થાત વાઘને અલગ અલગ લોકોએ અલગ અલગ દૃષ્ટિકોણથી મુલવ્યો છે. અહીં અમારે માટે વાઘ એ હિંસકવૃત્તિનું નહીં પણ આત્મગૌરવ અને પ્રેમ પામવાની મહેચ્છાનું પ્રતિક છે. આભાર.

  • વાઘ (વિકિપીડિયા પર)
Advertisements

24 responses to “વાઘ જ શા માટે ?

  1. શ્રી અશોકભાઈ

    આ તમારી જાહેર ચોખવટ ગમી.

    ’એનિમલ પ્લેનેટ’ વાળાઓએ થોડા સમય પહેલાં એક સર્વે કરેલો તે મુજબ વાઘ એ વિશ્વનું સૌથી લોકપ્રીય પ્રાણી છે ! ત્યાર પછીના ક્રમાંકે અનુક્રમે શ્વાન, ડોલ્ફીન, અશ્વ અને સિંહ આવે છે. (માણસ નામનું પ્રાણી તો મને એ યાદીમાં ક્યાંય દેખાયું જ નહીં !! Sorry !)

    સર્વે કરનારા માણસો છે. વળી સર્વે એનિમલ પ્લેનેટ વાળાઓએ કર્યો છે. બાકી કોઈ પશુ કે પ્રાણીઓને નોબેલ પ્રાઈઝ મળ્યા હોય તેમ સાંભળ્યું નથી તે માત્ર માણસોને જ મળે છે. ૧૪૦૦ વર્ષના ચાંગદેવ વાઘ ઉપર સવારી કરતા તેથી કાઈ વાઘનું મહ્ત્વ ન વધે, ચાંગદેવનું વધે અને હાથમાં સાપની ચાબૂક રાખતા તેથી કાઈ સાપનું મહત્વ ન વધે. ઓટલાને આકાશમાં ઉડાડનારા જ્ઞાનદેવ પાસે તો આ ચાંગદેવ પણ બચ્ચુ જ કહેવાય ને?

    જેને જે ગમે તે આઈકોન રાખી શકે છે પણ તેને લીધે માણસો કરતા પશુઓ શ્રેષ્ઠ નથી થઈ જતા. વળી, ભુપેન્દ્રસિંહ કોઈ ઓથેન્ટીક લેખક તો છે નહીં કે તે જે કહે તે આંખો મીચીને સ્વીકારી લેવાય.

    Like

    • શ્રી અતુલભાઇ, આપના વિચારોનું સંપૂર્ણ સન્માન કરતાં, અમુક તથ્યો હું પણ રજુ કરીશ. જે એક મનુષ્યમાત્ર જ કુદરતના કરિશ્મા સમાન હોવાના ભ્રમને થોડો હળવો કરશે.
      પ્રખ્યાત જર્નલ ’નેચર’ મુજબ ’ફ્રોગહોપર’ નામનું ૬ મી.મી. લાંબુ જીવડું હવામાં ૭૦ સે.મી. ઊંચો કુદકો લગાવી શકે છે. વૈજ્ઞાનિકોએ કરેલ તુલના મુજબ મનુષ્યએ તેની બરાબરી કરવા માટે ૨૧૦ મીટર (૬૯૦ ફીટ) એટલે કે અંદાજે ૭૦ માળના બિલ્ડિંગને કુદી જવું પડે !!
      એજ રીતે ચાંચડ નામક જંતુ ૭ ઇંચ ઊંચો અને ૧૩ ઇંચ લાંબો કુદકો લગાવે છે, જે માણસના ૪૫૦ ફીટ લાંબા કુદકા જેટલો થાય ! (લોંગ જમ્પનો હાલનો વર્લ્ડરેકર્ડ શું છે ?)
      આફ્રિકાના ’એમ્પાલા’ હરણ સાહજીક રીતે જ ૫૬ થી ૭૨ કિ.મી./કલાકના વેગે સત્તત દોડી શકે છે, અને હવામાં ૧૨ થી ૩૦ ફીટ જેટલા કુદકા મારી શકે છે.
      ગેંડા બિટલ નામનું ૨૦ ગ્રામ વજનનું ઢાલિયું જીવડું પોતાના વજન કરતાં ૮૫૦ ગણું વજન ઉંચકી શકે છે, તેની બરોબરી કરવા ૭૦ કીલો વજનનાં માણસે અંદાજે ૬૦ ટન (૬૦,૦૦૦ કિલો) વજન ઉંચકવું પડે !!
      આવા તો કંઇ કેટલાયે ઉદાહરણો છે, અમુક અહીં આપેલી લિંક પર જાણવા મળશે.
      ( http://news.nationalgeographic.com/news/2006/06/060623-super-animals.html )
      જો કે ’નેચર’ અને ’નેશનલ જીઓગ્રાફિક’ને પણ ઓથેન્ટીક ન જ માનવા, પરંતુ જાતે જ નેચરનું નિરિક્ષણ કરીને પણ કેટલાયે દાખલાઓ શોધી શકાશે જે ફક્ત એટલું જ સુચવે છે કે કુદરત માટે એક મનુષ્ય જ કંઇ ’આગલા ખોળાનો’ જીવ નથી. અને ધારો કે હોય તો તેનો રચનાકાર પક્ષપાતી કહેવાશે, જે માટે શાસ્ત્રો મનાઇ કરે છે.

      અહીં શારિરીક તુલના માત્ર કરી છે પરંતુ બુદ્ધિબળમાં (અને કુદરતી સમજશક્તિમાં) પણ ઘણા જીવો (ભલે મનુષ્ય જેટલા નહીં) આશ્ચર્યકારક તો લાગશે જ. અને નોબેલ પ્રાઇઝ માત્ર માણસોને જ મળે છે કારણ કે તે માત્ર માણસો દ્વારા જ અપાય છે !! એમ તો ફક્ત ઉપર ઉલ્લેખેલ જંતુઓ વધુ લાયકાત ધરાવતા હોવા છતાં ક્યાં કદી ઓલિમ્પિક મેડલ જીત્યા છે ! અને આપે ઉલ્લેખેલ ચાંગદેવ (હું આ વિશે વધુ જાણતો નથી) ધારો કે વાઘને બદલે ઘોડા કે તેવા કોઇ પ્રાણી પર સવારી કરતા હોત તો તેનો ઉલ્લેખ કરાત ? અર્થાત તેમનું મહત્વ જ એટલે થયું કે તેણે વાઘ પર સવારી કરી !
      હા, આપની એ વાત શાથે ૧૦૦% સહમત કે ભુપેન્દ્રસિંહજી હોય કે અન્ય કોઇપણ લેખક, તેની વાત આંખો મીંચીને ન સ્વિકારવી, પરંતુ આંખો મીંચી અને દરેક વસ્તુ સ્વિકારી લેવાની ટેવ પણ ફક્ત મનુષ્ય જાતને જ છે ને !!
      આજે પ્રથમ વખત કોઇ મિત્ર શાથે આટલી ભિન્ન ચર્ચા કરી છે, આશા રાખું આ ચર્ચા ફક્ત જ્ઞાનૌપાર્જનકાજ જ ગણાય, અંગત કે મનભેદ માટે કારણરૂપ ન ગણાય. આભાર. (અને આ લેખ પણ વ્યક્તિગત કોઇને માટે નહીં પરંતુ એ બહાને સૌ મિત્રોના વિચારો જાણી અને જ્ઞાનૌપાર્જન અર્થે જ લખાયો છે. તેથી સૌ મિત્રો, ભલે વિરોધમત માટે પણ આવકાર્ય જ છે.)

      Like

  2. વાઘ અને સિંહ ખાલી ભૂખ્યા થાય ત્યારે જ શિકાર કરે છે.અને માનવી?કોઈ વાઘે બીજા વાઘો ના સમૂહ નાં ૬૦ લાખ લોકો ને બીજા વર્લ્ડ વોર જીવતા બાફી નાખેલા જોયા?કે જાણ્યા?એ કામ ફક્ત માનવી જ કરી શકે.ભાગલા પડ્યા ભારત ના ત્યારે બે ભાઈઓ નાં સમુહે એક બીજા ના થઇ ને ૧૦ લાખ લોકો ને મારી નાખ્યા તેવું વાઘ લોકો કરી શકે?એ કામ ફક્ત માનવી જ કરી શકે.કહેવાતા દંભી અહીન્સકોએ ચામડા ના બેલ્ટ પહેરવાનું પહેલું છોડી દેવું જોઈએ.૧૪૦૦ વર્ષ ના ચાંગદેવ?હા!!હા!હા!હા!!કઈ દુનિયામાં જીવો છો?કોઈ માણસ આટલું જીવી શકે કદી?આયુષ્ય તો હવે વધ્યું છે.વાઘ ની સવારી?સાપ ની ચાબુક?પથ્થર નો ઓટલો ઉડી શકે?આ બધું ઓથેન્ટિક છે?હું તો ઓથેન્ટિક લેખક નથી.ખરેખર ભારત ને લોકો મદારીઓ નો દેશ અમસ્તો નહોતો કહેતા.ખોટા પ્લેન શોધવાની મથામણ કરી.જ્ઞાનેશ્વર ને બહુ સમય નથી થયો.એમણે આ પથરા ઉડાડવાની વિદ્યા આપતા જવા જેવી હતી.ભારત હંમેશા કલ્પનાઓ માં જ જીવવા માંગે છે કે શું?પશુઓ ને નોબેલ પ્રાઈઝ ની શું જરૂર?પશુઓ ખુદ નોબેલ જ છે.કુદરત આગળ ના માણસ શ્રેષ્ઠ છે નાં પશુ.શ્રી હરી દિવ્ય વિમાન માં લોકો ને સદેહે સ્વર્ગ માં લઇ જાય.અહી ઓટલા ઉડે.વાહ ભાઈ વાહ!!!!

    Like

    • શ્રી ભુપેન્દ્રસિંહજી,
      “કુદરત આગળ ના માણસ શ્રેષ્ઠ છે નાં પશુ.” આપની આ વાત વૈજ્ઞાનિક સત્ય છે, શાથે શાથે સમજાય તો અધ્યાત્મિક સત્ય પણ છે. આપ સાચા છો કે પશુઓ ખુદ નોબેલ જ છે, તેને શાંતિ માટેના નોબેલની પણ શું જરૂર છે ! એ જરૂર તો પોતાને દેવના દિધેલા સમજી અને ડકરી ગયેલા મનુષ્યોને જ પડે !! મનુષ્યને કુદરતે ઉત્ક્રાંતિથી વિચારક્ષમતા આપી છે જેનો ઉપયોગ કરી તે જગત પર રાજ કરે છે પરંતુ શાથે શાથે રાજકર્તાની તમામ જવાબદારીઓનું નિર્વહન પણ જરૂરી તો છે ને ? જે યોગ્ય રીતે નહીં કરાય તો કુદરત માટે અન્ય જીવને તે જવાબદારી સોંપવાનું કાર્ય કંઇ અઘરૂં નથી. અને તેમાં આપણને મનાવી દેવાતા કોઇ પાપ-પુણ્ય આડા નહીં આવે કે ન કોઇ અવતાર બચાવવા આવશે ! (અરે યાદ આવ્યું ’અવતાર’ જોયેલું કે નહીં ?) કંઇ ખોટું હોય તો સુધારશો. આભાર.

      Like

  3. શ્રી અશોકભાઈ,કાલે જ ઓરકુટમાં મારુ સ્ટેટસ અપડેટ કર્યુ હતુ કે ‘પૃથ્વી પરનું સૌથી વધૂ હિંસક પ્રાણી મનુષ્ય છે’.તેમાં એક મિત્રએ કૉમેન્ટ આપ્યો કે ‘તેમાં તમે પણ આવી જાવ રાજનીભાઈ’. સ્વભાવિક રીતે મેં જવાબ આપ્યો ‘હું પહેલા’.
    પહેલા પણ તમે કહ્યુ હતુ કે બ્લોગજગતમાં આપણે બે જ જંગલી જાનવરો છીએ (સાપ અને વાઘ).તમે વાઘનો લોગો કેમ રાખ્યો એ તો સમજાય ગયુ અને મેં સાપનો લોગો કેમ રાખ્યો ?કેમકે વાઘ,સિંહ(બીજા ઘણા વાઈલ્ડ પ્રાણીપક્ષી)ના અભ્યારણ્યો ચાલે છે.સાપ બચાવાના અભ્યારણ્યો ચાલતા નથી.સાપ પ્રત્યે લોકોની માનસિકતા પણ જબરી છે.ઘણા લોકો માટે સાપ એટલે ઝેર,ઝેર અને માત્ર ઝેર.એટલે હું પણ કહુ છું “કોબ્રા જ શા માટે ?” (કોબ્રા કરતા માણસ વધૂ ઝેરી છે)

    Like

    • રજનીભાઈ,
      મેં એક રીપોર્ટ એવો વાંચેલો કે એકલા નાગપાંચમ ને દિવસે ખાલી ભારત માં ૮૦,૦૦૦ સાપ મરી જાય છે.કેમ કે દંભી ભારતીયો નાગ બાપા ને દૂધ પીવડાવી સ્વર્ગ ની ટીકીટ બુક કરાવવા માટે ૮૦,૦૦૦ સાપો નું એકજ દિવસ માં નિકંદન કાઢી નાખે છે,બોલો કોણ વધારે ઝેરી કોબ્રા કે માણસ?મુરખો એટલું સમજતા નથી કે સાપ દૂધ નાં પીવે.આ દૂધ એના ફેફસા ફાડી નાખે છે.એટલે જે મદારીઓ સાપ લઇ ને ફરતા હોય તેમના તો મારી મારી ને ડૂચા કાઢી નાખવા જોઈએ.have badhaa bharaityo ને murakh ane દંભી na samaji levaa vinanti.

      Like

      • હવે ભારતમાં સાપને લઇને ફરનાર મદારીઓ પર કાનૂનિ પ્રતિબંધ છે, તેને પોલિસ પકડી શકે છે. ક્યાંય આવા ખેલ દેખાય તો પોલિસને જાણ પણ કરી શકાય. સાપ દૂધના પીવે ?? શું વાત કરો છો ?? અરે પથ્થર પણ દૂધ પીવે તો સાપ કેમ નહીં ? હા !! હા ! હા.

        Like

    • શ્રી રાજનીભાઇ, આભાર.
      ‘પૃથ્વી પરનું સૌથી વધૂ હિંસક પ્રાણી મનુષ્ય છે’ આ વાતનો વિરોધ કરવો કેમ ? સાવ સાચા છો.
      મારી પાસે ૨૦૦૭નાં આંકડા છે જે મુજબ ફક્ત શાર્કની ફિનનો સૂપ બનાવવા માટે વર્ષે ૩.૮ કરોડ શાર્કનો શિકાર કરાય છે. ફક્ત સિંહ-વાઘની માફક પેટ ભરવા માટે આ હીંસા હોય તેવું કેમ મનાય, આ તો મનુષ્યના સ્વાદ શોખને પોષવા માટે છે. (કારણ કે શાર્કની ફિન, જે તેના શરીરનો નાનો પણ મહત્વનો હીસ્સો છે, કાપી લઇ અને બાકીની શાર્કને મરવા માટે ફરી સમૂદ્રમાં છોડી દેવાય છે.) અહીં સ્વજાતિને નિમ્ન બતાવવાનો મારો કોઇ ઉદ્દેશ નથી પરંતુ જાતને આયનામાં જોવાનો અને મનુષ્ય દ્વારા કરાતા કુદરતના વાસ્તવિક દ્રોહને સમજવાનો પ્રયાસ માત્ર છે. કારણ કે આપણે જાણીએ છીએ કે કુદરત ઇંટનો જવાબ હંમેશા પથ્થરથી આપે છે ! અને એ પથ્થરાવ થાય તે પહેલાં આપણે સમજી જઇએ તો આપણા જ ભાવિ માટે ઉત્તમ છે. આપનો સર્પપ્રેમ (જો કે આમતો પ્રકૃતિપ્રેમ કહેવો જોઇએ)વંદનિય છે. ક્યાંક વાંચેલું કે મનુષ્યની દાઢમાં મોટાભાગના સર્પના ઝેર કરતાં પણ વધુ ઘાતક જીવાણુઓ વસે છે. એટલે માણસ જો અન્યને બટકું ભરી લે તો જીવલેણ નિવડી શકે. સાચું હશે ? આભાર.

      Like

      • સાવ સાચું.દાઢ માં વિશિષ્ટ પ્રકાર ના બેક્ટેરિયા હોય છે.અહી એક ૭૦ વર્ષ ના ડોશીમા હોટેલ માં રહ્યા હશે કોઈ કારણસર.હોટેલ ના એક કર્મચારીએ એમની એકલતા નો લાભ લેવા પ્રયત્ન કર્યો હશે.પેલા બહેને પ્રતિકાર કરેલો તેમાં હાથે બચકું ભરી લીધેલું.ઝેરી બનેલા પેલાએ એમણે મારી જ નાખ્યા.પોલીસ તપાસ ચાલુ થઇ.પેલો સારવાર માટે ડોક્ટર પાસે જતો હશે,ત્યાં પોલીસે પેલો ખૂની જાણે નહિ તેમ સંપર્ક ડોકટર નો કર્યો અને ડોકટરે પણ એને ખબર ના પડે તેવી રીતે ચકાસી લીધું.એના હાથ નાં ઘા માંથી પેલા દાઢ માં રહેલા બેક્ટેરિયા મળ્યા.જે પેલા બહેન ની દાઢ માં હતા.બસ એને જનમટીપ મળી ગઈ.

        Like

  4. અશોકભાઇ આપનું ઓળખચિહ્ન વાધ દેશ પ્રેમ અને પ્રકૃતિ પ્રેમ માટે છે વાહ ખૂબ જ સરસ.

    વાઘ એ હિંસકવૃત્તિનું નહીં પણ આત્મગૌરવ અને પ્રેમ પામવાની મહેચ્છાનું પ્રતિક છે.

    ‘પૃથ્વી પરનું સૌથી વધુ હિંસક પ્રાણી મનુષ્ય છે’ આ વાતનો વિરોધ કરવો કેમ ?

    “કુદરત આગળ ના માણસ શ્રેષ્ઠ છે ના પશુ.” વૈજ્ઞાનિક સત્ય છે, સાથે સમજાય તો અધ્યાત્મિક સત્ય પણ છે. પશુઓ ખુદ નોબેલ જ છે, તેને શાંતિ માટેના નોબેલની પણ શું જરૂર છે !

    આપનો ચોખવટ લેખ રાજની ભાઇ , ભૂપેન્દ્રસિંહજીના પ્રતિભાવો અને આપના પ્રતિભાવ પણ ખૂબ જ માહિતીપ્રદ. વાંચવા ખૂબ જ ગમ્યા.

    Like

    • આભાર, મીતાબહેન. આમતો લેખનો મુદ્દો ’આઇકોન’ ચિત્રની ચોખવટ માટેનો હતો પરંતુ એ બહાને મનુષ્યેત્તર જીવોનો અંતઃર્નાદ પણ વ્યક્ત કરવાનો મોકો સૌ મિત્રોના સહકાર અને સંગાથે મળી ગયો ! ચાલો આ બહાને એ મુંગાજીવો પર પણ આપણે સૌએ કંઇ કંઇ સદ્‌વિચારો તો રજુ કર્યા. આશા છે સમય આવ્યે આપણે તેઓને વાસ્તવિક ઉપયોગી પણ થઇ આપણા મનુષ્યત્વનું ગૌરવ વધારીશું જ. આભાર.

      Like

  5. “PA” Very Good, one more thing you miss about Tiger is — me, 🙂
    Ha ha ha…
    Have a nice Day…

    Like

  6. અશોકભાઈ, રાજનીભાઈ અને ભુપેન્દ્રસિંહ

    અપ સહુની વાત ઉપરથી તેવું લાગે છે કે માનવીઓ કરતાં જુદી જુદી બાબતઓમાં જુદા જુદા પશુઓ શ્રેષ્ઠ છે. વળી પક્ષીઓ તો આજે પણ સહજ રીતે ઉડી શકે છે તેથી તેમને પણ માનવી કરતા શ્રેષ્ઠ ગણી લ્યો.

    શારિરિક ક્ષમતા અને અમુક બાબતોમાં અમુક પ્રાણીઓ અને પક્ષીઓ વધારે સંવેદન ધરાવે છે. આધ્યાત્મિક દ્રષ્ટિએ જોઈએ તો આ સહુ નું ચાલક બળ ચૈતન્ય છે પણ અંત:કરણ અને બહી:કરણ (શરીરની રચના) ને આધારે આ બધાના કાર્યો અને ક્ષમતા માં ફેર પડે છે. મનુષ્ય પાસે જો કશું વીશેષ હોય તો તે તેની ચિંતન કરવાની ક્ષમતા છે. જેવી રીતે ક્રુર મનુષ્યો અનેકની હિંસા કરે છે તેવી રીતે ઉદાર દીલના મનુષ્યો અનેક કલ્યાણકારી કાર્યો પણ કરે છે. પણ જેને હંમેશા નકારાત્મક જોવું છે તે તો અડધો ખાલી ગ્લાસ જોયા કરશે. મનુષ્ય પાસે થોડી ઘણી કર્મ કરવામાં સ્વતંત્રતા છે જ્યારે અન્ય પશુ પક્ષીઓ માં આવી સ્વતંત્રતા જોવા નથી મળતી. વળી મનુષ્ય પ્રકૃતિ ઉપર કઈક અંશે કાબુ કરી શકે છે જ્યારે પશુ અને પક્ષીઓ ના ભાગે હંમેશા પ્રકૃતિને વશ થાવનું જ નીર્માણ થયેલ હોય છે. ટુંકમાં મનુષ્યો પાસે પશુ પક્ષીઓની અપેક્ષાએ વધારે સારુ અંત:કરણ છે પછી તેનો ઉપયોગ તે બીજાને મદદ કરવા માટે કે બીજાનું શોષણ કરવા માટે કરી શકે છે. અને પક્ષીઓ તો આજે ય ઉડે છે અને ભારતે પણ મીસાઈલ, ઉપગ્રહો અને પ્લેન બનાવ્યા જ છે આ જ પ્લેનોમાં બેસીને ભારતમાં થી બહાર ગયેલા લોકોએ એમ ન માનવું જોઈએ કે તેઓ ભારતમાં રહેલા ભારતીયો કરતા વધારે શ્રેષ્ઠ છે.

    Like

    • શ્રી અતુલભાઈ,
      અશોકભાઈએ કહ્યુ તે પ્રમાણે ‘કુદરત ઇંટનો જવાબ હંમેશા પથ્થરથી આપે છે !’.કુદરતના ખોળે બધા જ જીવો એક સમાન છે.તાજુ ઉદાહરણ છે.લેહમાં જે તબાહી થઇ તેમાં માત્ર મનુષ્ય મૃત્યુ નથી પામ્યા.મોબાઈલ અને આજની લેટેસ્ટ ટેકનોલોજીમાંથી નિળતા વિદ્યુતચુંબકીય તરંગો (બીજુ ઘણુ) એટલે મનુષ્યનું ઝેર.આ ઝેરની સૌથી વધૂ અસર પક્ષીઓ પર થાય છે.પક્ષીઓને દિશાજ્ઞાન અંગેની કુદરતી બક્ષીસ હોય છે.પક્ષીઓ પર્યાવરણમાંથી કુદરતી રીતે પ્રસારતી તરંગો દ્વારા પોતાની દિશા નક્કી કરે છે.પણ મનુષ્યનું ઝેર તેમને બાધારૂપ થાય છે.જેથી ઘણા પક્ષીઓ દિશા ભટકી જાય છે અને મૃત્યુ પામે છે.મનુષ્યએ પણ પ્લેન બનાવવા માટે પક્ષીઓનો આધાર લિધો છે.(પ્લેનના ઉદ્‍ભવ અને વિકાસની ડોક્યુમેંટ્રી ફિલ્મ હિસ્ટ્રી ચૅનલ પર જોઈ હતી)

      Like

    • શ્રી અતુલભાઇ,
      “આધ્યાત્મિક દ્રષ્ટિએ જોઈએ તો આ સહુ નું ચાલક બળ ચૈતન્ય છે”… “મનુષ્ય પાસે જો કશું વીશેષ હોય તો તે તેની ચિંતન કરવાની ક્ષમતા છે.”… બહુ સુંદર વાત કહી. અને એટલે જ, મારા દૃષ્ટિકોણ મુજબ, મનુષ્યની જવાબદારી વધુ રહે છે કે પોતાની ચિંતનશક્તિ દ્વારા સમગ્ર જગતની ભલાઇ વિચારે. આપ તો આ બાબતના સારા એવા જાણકાર છો જ. રહી વાત વ્યક્તિગત શ્રેષ્ઠતાની તો એ સાચું જ કે તે વ્યક્તિગત આચાર-વિચાર પર અવલંબે છે, જગતના કોઇ પણ ખુણે શ્રેષ્ઠતા અને કનિષ્ઠતા શાથે શાથે મળી શકે છે. તેમાં પણ મનુષ્ય કરતા પ્રાણીઓ કે પ્રાણીઓ કરતા મનુષ્ય શ્રેષ્ઠ તેવું કશું ના હોય, દરેકમાં અલગ અલગ કુદરતી ગુણ-અવગુણ હોય જ એ સાચી વાત છે. આપનો આભાર.

      Like

  7. તમે હળવી શૈલીમાં લખેલ પોસ્ટ ગમી પણ પછી કદાચ વાતનું વતેસર થઈ ગયું ! જો કે એમાંયે તમે અને અન્ય મિત્રોએ કોમેન્ટમાં પણ ખરેખર ઘણી જાણવા જેવી માહિતી આપી એ બદલ આભાર.

    નોંધ – કોઇએ વ્યક્તિગત ટૉપિ પહેરવી નહી!

    Like

  8. શ્રી અશોકભાઈ,
    મિત્રો ને કુદરત આગળ કોઈ નાનું કે મોટું કોઈ શ્રેષ્ઠ કે કોઈ કનિષ્ઠ એવું કશું જ હોતું નથી તે સમજતા બહુ વાર લાગશે.કુદરત ના તો ક્રૂર છે નાં દયાળુ.કુદરત માં નાં કોઈ કહેવાતી નૈતિકતા છે.ભારતે શું બનાવ્યું છે તે અમારી જાન બહાર હોય તેવું ભાગ્યેજ બને.જ્યારે મારા પોતાના મોટા ભાઈશ્રી ડો.જીતેન્દ્ર રાઓલ બેંગલોર સ્થિત નેશનલ એરો સ્પેસ લેબોરેટરીઝ નાં એક મહત્વ ના સીનીયર વૈજ્ઞાનિક અને ડેપ્યુટી ડાયરેક્ટર તરીકે રહી ચુક્યા હોય.નાગ,પૃથ્વી,અગ્નિ અને એવા બીજા દરેક મિસાઈલ નાં પ્રોજેક્ટ માં કામ કરી ચુક્યા છે.અને તેના પરીક્ષણ વખતે શ્રી હરિકોટા હાજર રહી ચુક્યા છે.ઉપગ્રહો ભારતે બનવ્યા છે તે આખી દુનિયા જાણે છે.અને ભારતે કોઈ જનપરીવહન વિમાન બનવ્યા હોય તેવી જાણ નથી આવ્યું.હા ભારતે એક LCA બનાવેલું છે જેને લાઈટ કોમ્પેક્ટ એરક્રાફ્ટ કહેવાય જે એક મીગ વિમાન જેવું ફાઈટર પ્લેન છે.આ પ્લેન કોઈ એક વૈજ્ઞાનિક ના બનાવી શકે એમાં હજારો વૈજ્ઞાનિકો નો સામુહિક ફાળો હોય છે.આ LCA ના નિર્માણ માં પણ ડો.જીતેન્દ્ર રાઓલ નાં હાથ નીચે ૭૦ કરોડ નો પ્રોજેક્ટ હતો.બીજું એક ૧૪ સીટર એવું નાનકડું પ્લેન બનાવેલું છે જેમાં પણ એમણે પ્રોજેક્ટ પાર પાડેલા છે.આ બધા કામો ને લઈને રાષ્ટ્રપતિ ચંદ્રક વિજેતા પણ બનેલા છે.પણ ભારતે જન પરિવહન પ્લેન બનાવ્યા નથી.મૂળ મુદ્દો ભુલાઈ જાય છે કે ઓટલા ઉડાડી શકતા હોય તો આ બધી ભેજામારી કરવી ના પડત.એક એક પ્રોજક્ટ પાછળ અબજો રૂપિયા અને હજારો વૈજ્ઞાનિકો નાં બ્રેન ની કઢી થઇ જાય છે તે નાં થાત ને?ભારત નાં પ્રાચીન બુદ્ધિજીવી વર્ગે એક બાળક ના જન્મ થી માંડી ને મરે ત્યાં સુધી ની દરેક વિધિ માં એમના રોટલાની જ ચિંતા કરી છે.ઓટલા ઉડાડવાના અહોભાવ પેદા કરી ને પ્રજા ને મુર્ખ બનાવે રાખી છે.અમે ફરી ફરી ને કહીએ છીએ અમે ભારત ની સિર્ફ મુર્ખ પ્રજાને જ મુર્ખ કહીએ છીએ,બધાને નહિ.પણ વાંચેજ કોણ છે? ભારત માં પણ શ્રેષ્ઠ માણસો રહે છે અને અહિ પણ.ભારત મા પણ મુર્ખ માણસો રહે છે અને અહી પણ.

    Like

  9. શ્રી અશોકભાઈ

    વાઘ ખરેખર પ્રેમાળ પ્રાણી છે તે વીશેનો એક લેખ વાંચવા અને ખાસ તો ફોટોગ્રાફ જોવા નીચેની લિન્ક ઉપર ક્લિક કરશો.

    http://bhajanamrutwani.wordpress.com/2010/08/19/tiger-temple/

    Like

  10. તમારું પ્રતીક વાઘ છે – તો ’વાઘમારે’ અટકવાળાઓ વિશે તમારું શું માનવું છે?
    અને એવું તે શું કર્યું છે કે તમને સરકારી રક્ષણની જરૂર પડે?
    આ તો એવું તેવું કંઈ કર્યું હોય તો બીજી વાર બ્લૉગે આવતાં પહેલાં વિચારીએ ને ભાઈ?

    Like

    • શ્રી ભૂષિતભાઇ, આપે પધારી અને “શોભામાં અભિવૃદ્ધિ” કરી તે બદલ આભાર. (ભૂષિત = શોભાયમાન, અલંકૃત)
      ’વાઘમારે’ કુટુંબના કોઇ વડવાએ ભૂતકાળમાં કદાચ વાઘ શાથે બથંબથા કરવાનું પરાક્રમ દાખવ્યું હોય તેની ગૌરવપૂર્ણ યાદગીરીરૂપે આ અટક પડી હોય શકે.
      અમે તો ભ‘ઇ ભલાભોળા પ્રાણી છીએ ! (અને માટે તો રક્ષણ હેઠળ રહેવું પડે છે !!) આપનું હંમેશા સ્વાગત છે, બટકું નહીં ભરવાની ખાત્રી આપીએ છીએ 🙂
      આભાર.

      Like

      • મને ’પ્રમથ’ જ રાખો તો સારું.
        બીજું તમે બટકું ન ભરવાની ખાતરી આપો છો તે જાણી આનંદ થયો.
        મારાં બાળકો રોજ મારી પાસે ’હિતોપદેશ’ વંચાવે છે. તેમાં પેલું વરુ આવી જ ખાતરી આપતું આપતું લોભી બ્રાહ્મણને ખાઈ જાય છે.
        હવે તો તમારા બ્લૉગને નવ ગજના નમસ્કાર! હવે હાસ્યના લોભે વાઘની હડફેટે નથી ચડવું! 🙂

        Like

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s